Saltar a contenidos

Normalización llingüística

Navegación

Menú principal

Nomes y apellíos n'asturianu

Nomes Ampliar imatge
Nomes y apellíos n'asturianu: diz muncho de ti.

Hasta hai unos años yera obligatorio pa toles persones d'España que'l so nome y los sos apellíos s'inscribieren oficialmente na so forma castellana. Les formes correspondientes en catalán, en gallegu o n'asturianu emplegábense a diario na fala. En casa podíes ser Taresa, Antón, Xuacu o Xuana, pero nos documentos oficiales siempre ponía Teresa, Antonio, Joaquín o Juana. Lo mesmo pasaba colos apellíos, que se castellanizaben nos rexistros, pasando de Xardón a Jardon, de Mexíu a Megido o de Fidalgo a Hidalgo. Al nun poder constar nos documentos, eses formes diben, poco a poco, perdiéndose.

Agora, la llei reconoz la diversidá llingüística d'España y permite que los nomes y apellíos de la xente recueyan esa riqueza cultural. N'Asturies tamos a tiempu de recuperar los nuesos nomes y apellíos tradicionales y, con ellos, la memoria de los homes y muyeres que poblaron esta tierra nes xeneraciones pasaes.

Si quies que se note que yes d'Asturies o vienes de fuera pero te presta sintite d'equí, falar como la xente d'equí y dar a los tos fíos o fíes los nomes d'esta nueva tierra, pues facelo ensin nenguna complicación nin dificultaes. La llei ta de la to parte.

Lo que podemos facer

-Asentar a los recién nacíos col nome propiu en llingua asturiana.

-Cambiar el nuesu nome pol so equivalente en llingua asturiana.

-Decidir, de común acuerdu del padre y la madre, l'orde de los apellíos pa fíos y fíes.

-Recuperar la forma tradicional de los apellíos asturianos.



PA PONER EL NOME N'ASTURIANU
Antes que nada, consulta nel llibru Delles propuestes pa nomes de persona, editáu pola Academia de la Llingua Asturiana (Coleición Cartafueyos Normativos 2) la llista de nomes y la so forma ortográfica recomendada.

Si yes mayor d'edá namás tienes que solicitar per escrito nel Rexistru Civil que te cambien el nome pol equivalente en llingua asturiana. Has presentar una instancia, un certificáu onde s'afite la equivalencia ente'l to nome llegal y el que vas poner (esti dántelu n'organismos oficiales como l'Academia de la Llingua Asturiana), el DNI y una copia del certificáu lliteral de nacencia.

Pa los recién nacíos, namás fai falta que los inscribas col nome asturianu que más te preste.



PA PONER LOS APELLÍOS EN FORMA ASTURIANA

Si yes mayor d'edá, solicítalo per escrito al Rexistru presentando una instancia, un certificáu qu'acredite la forma asturiana que correspuende a los tos apellíos oficiales, un certificáu lliteral de nacencia y el DNI. Los tos fíos y fíes llevarán el to apellíu n'asturianu si yá lu cambiasti.



PA SACAR EL DNI COL NOME Y APELLÍOS CAMBIAOS
N'arreglando l'asuntu nel Rexistru Civil, ye bueno que lo corrixas tamién nel carné d'identidá. Si'l to DNI ta en vigor y solo lu cambies pa sustituyir el nome o los apellíos pola forma vernácula, el trámite ye gratis. Namás tienes de dir a la Comisaría de Policía col DNI, dos fotos y el documentu del Rexistru Civil onde figuren el nome o los apellíos corrixíos.